Учество на претставник од ЈЗУ Центар за Јавно Здравје – Штип на меѓународен курс во Сингапур

Во периодот од 8 до 12 септември 2025 година, д-р Светлана Живкова, специјалист по епидемиологија во ЈЗУ Центар за јавно здравје – Штип, учествуваше на меѓународниот курс „Urban Health Security Programme“ кој се одржа во Сингапур, во организација на Singapore Cooperation Programme Training Award и Ministry of Foreign Affairs, Singapore, спроведено од страна на Saw Swee Hock School of Public Health, National University of Singapore.

Учесниците на овој курс беа номинирани од нивните влади (Nominated by their respective Governments), а финалната селекција беше од страна на организаторите во Сингапур. Врз основа на квалификациите на апликантите, за учество на курсот беа избрани 24 учесници од Европа, Азија и Африка од вкупно 120 пријавени лица. Со што се овозможи размена на искуства и добри практики од различни здравствени системи.

Курсот беше насочен кон унапредување на капацитетите на националните и локалните здравствени власти за справување со здравствени итни состојби во урбани услови. Програмата опфати предавања, дискусии и работа во групи, како и теренски посети во клучни институции.

Главни теми на курсот беа:

Национални и локални капацитети за подготвеност и одговор при епидемии.

Урбана епидемиологија и социјални детерминанти на здравјето.

Управување со нови и заразни болести кои повторно се појавуваат.

Комуникација на ризик и доверба со заедницата.

„One Health“ пристап: мултисекторска соработка помеѓу јавното здравје, ветеринарството и животната средина.

Примена на нови технологии во епидемиолошки надзор и анализа.

Посебно значајни беа теренските посети, меѓу кои и Националниот центар за инфективни болести во Сингапур (NCID), Управата за урбано планирање и Националните паркови (NParks), каде учесниците се запознаа со практични модели на подготвеност, биосигурност и вклучување на заедницата во здравствената безбедност.